Bernhard Gigacher
~ gschriebm wia gredt ~
Erzählungen & Gedichte in Kärntner Mundart
Kontakt: tintnfasle@gmail.com
Wiaso in Mundårt?
….då war noch wås, so hätt` i gmant,
wal heitrawånn ban Schpegguliarn,
då kemand Gsatzlan auf, a gånz sekant,
bring se nit ause von mein Hirn.
Åls Bua wår mir as sege gleich,
tåmb eh gnua åndre verslat denkn,
wånn dichtn tatast, werst a nit reich,
tua mit der Såch ka Zeit varschenkn.
Zuden, ament tat fahln, nebst dar Gasch,
dar Zuagång zua de Liabesgschtåltn,
s`gabat Glachtar, a murds Blamasch,
so tuast besar woll de Pappm håltn.
Jå, wånn i schreibm kinnat wia dar Kårl May,
war eppar går dar Freind von Winnetou,
odar de Agatha schickat in Poirot vurbei,
i war in dar Schtubm ghuckt awoll in Nu.
So beilafe gib`s a weitars Hindarnis,
wia wånn`s lei haparn tat mit Fantasie,
hon gsehgn, wås ålls so gschriebm is,
fiar`s dege Deitsch, fahlt mar de Simpathie.
I bring de Schpråch nit fiaranånd,
då tuand mir ålle Verslan z`rinan,
de Gramatik tiarmt se auf wia Wånd,
a de Beischtrich bringand mi zan Schpinan.
S`kinnat sein, dåss i`s in Mundårt kånn,
då låsst si`s Greimte woll aweane richtn,
tua Wertlan drahn, henk wo a Sülbm drånn,
s`is wia mit`n Scheitlanholz a Leggn schlichtn.
Bevur a gaxt a rechtar Ånfång war,
mit Gschreibach und dar Dichtarei,
wår heifte z`tan, anigs a schwar,
a dås Gedaldar is zan Glick vurbei.
Hiatz, wo i a åltar Lotar wer,
kimb wiedar viar de Dichtarei,
de Reimlan warnd agår nit schper,
måcht glått a Freid, de Schintarei.
Heit is mar de Blamasch a wurscht,
a s`Glachtar kånn i sölbar måchn,
kriag i ban Schreibm gach an Durscht,
an Goethe z`liab, hülft Rebm-Gschmåchn.
Wår friahra eppar drånn zan denkn,
wia solltat i de Såchn schreibm,
sege schert mi nit, s`gib ka Varrenkn,
wås und wia i red`, terf ibarbleibm.
Mei Mundårt håt mi s`Lebtelång,
woll jedn Tåg a durchgetrågn,
getschwaldart vül, in Gurktål-Klång:
„Varschteahst is guat, sunst tuast hålt frågn!“
Dås wår woll eppar mei Devisn,
a ba de Deitschn, wo i lång wår,
hon mi in Wean a nia vül gschissn,
z`meist håt`s mar gholfn, richte wåhr.
Freile woll, i kim aus Kärntn,
an jedn werd`s mit Schtolz a gsåg,
authentisch, eloquent, wår z`erntn,
hon mi mit Hoachdeitsch nia geplåg.
So schreib i a, nåch meine Regln,
beschtim de Satzlan zerscht fiar mi,
mei Weible tuat mi niedarbegln,
wånn`s ihra gfållt …dånn a fiar di!